Berezia izango da bihar eguerdiko meza Elgetan. Agerkundeko meza izateaz gainera, 23 urtez herriko parroko izandako Juan Cruz Juaristiren agurreko ospakizuna izango da. 12:00etan hasiko da elizkizuna.
Apaiz ibilbide luzea egin du Juaristik; izan ere, 93 urterekin hartuko du erretiroa. Elgetako parrokiara heldu aurretik 37 urte eman zituen Ruandan misiolari moduan. Meza berezia izango den galdetuta honala dio: "Ez nuen asmorik ezer berezirik egiteko, baina bikario nagusiak deitu zidan esanez etorri egingo zela meza esatera eta horrela izango da. Mikel Aranguren bikario nagusiak esango du meza eta alboan izango gara nire ondorengoa izango den Imanol Prieto, Enrike Ormaetxea diakonoa eta ni neu. Nire agurra eta Imanolen aurkezpena izango da ospakizuna".
Imanol Prieto Bergarako eta Antzuolako parrokoa da. Aurrerantzean, Elgetakoa ere izango da.