Elgetara Karabietatik behera sartuz gero, hamazazpi zuhaitz handik egiten zieten harrera heldu berriei. Larrabilzearreko bidegurutzetik hilerri osteko tartean egon dira urte luzez, GI- 2639 errepidearen alde bietan.
Foru Aldundiko artapen-lanetako brigadak astelehenean moztu zituen guztiak. Kimatze eta mantentze-lanak egin dituzte GI-2639 errepideko hainbat puntutan, tartean San Roke osteko errepide zatian.
"Bizilagunen eskariz, Udalak kimatze lanak egiteko eskaera zuen egina. Astelehenean etorri ziren eta egoera aztertu ostean zuhaitz guztiak moztea erabaki zuten", azaldu du Ibon Unzetabarrenetxea alkateak.
Udal arduradunak uste du komeni dela motxondoak ere kentzea. "Bertan utzi dituzte eta arrisku iturri dira".
