Iaz egin zen Emakumea eta kirola ekimena Elgetan lehen aldiz. Amantalak talde feministak antolatua, pilota izan zuen ardatz.
Aurtengo egitaraua prest da eta antolatzaileek egun osoko egitaraua aurkeztu dute. Azaroko azken zapaturako iragarri dute, hilaren 29rako.
Oraingoan, dantza izango dute ardatz eta ekintzak 10:30ean hasiko dira. Hainbat dantza saio izango dira: zumba (11:15), erromeria (12:45), swing (16:30) eta aretoko dantzak (18:30).
Hasi aurretik kafea hartzeko elkartuko dira emakumeak kiroldegian eta elkarrekin bazkaltzeko tartea ere hartuko dute. Bazkarirako txartelak salgai daude Haizea tabernan. Hilaren 23ra arte egongo dira salgai. Prezioa da 10 euro.
Amantalak talde feministako Ainara Belamendiak azpimarratu du hainbat kolektibotako emakumeak ari direla Emakumea eta kirola ekimena antolatzen. "Gurekin batera ari dira, esaterako, frontenisean aritzen den emakume taldea zein beste norbanako asko".