Domingo Iturbe Fest jai batzordeak lanak izan ditu kaleko lehen jaiak antolatzerako orduan. Euriaren beldurrez, frontoi zaharrean egitekoak ziren ekintza gehienak, Espaloia Antzokira lekualdatu zituzten. Bada, asteburu osoan egin ez duen euria bota du danborradan, 60 lagun inguru kalera irten direnean.
Dena den, euriak ez du festa giroa eten. Kalejira txiki bat egin ostean –euria hasi denean–, musikariak arkupean sartu dira, danborrarekin zihoazenak berriz, euripean jarraitu dute San Sebastian, Tatiago, Iriyarena, Diana, Debako martxa eta Elgetako martxa jotzen. Herritarrek ere ez dute hutsik egin eta gogoz jarraitu dute jaietako ekitaldi nagusia.
Ekintzaz betetako asteburua
Kaleko jaiak atzo hasi ziren, lehenengo etxafuegoarekin, eta, horren ostean, musika izan zen nagusi; karro-poteoa, DJ Txasioren saioa, herriko Babesgabe taldearen kontzertua, eta, Pablo Manso eta Ander Sarasuaren lehen DJ sesioa izan ziren.
Gaur berriz, janariaren bueltan joan da eguna; goizean, bakailao lehiaketa eta umeendako pintxo hotzen lehiaketa izan dira, eta, eguerdian, 125 lagunek bazkaldu dute Paella Espaloian.
