Iaz ere egin zuen eskaintza Udalak, eta egon ziren izen-emateak baina ez taldea martxan jartzeko eskatzen zen gutxienekoa. "Ekimen ederra dela iritzita aurten, berriro ere saiakera egitea pentsatu dugu", azaldu du Euskara zinegotzi Maialen Arnedok.
Ekimena 8 urtetik aurrerakoendako da. Taldea osatzen bada bertso eskolaren saioak urritik ekainera artekoak izango dira, astean behin, ordubetez. Bertsozale elkarteko kide batek gidatuko ditu. Ikasturte osoko matrikula 75 euro dira. Barikua baino lehen eman behar da izena udaletxean edo hemen.
Eskolako saioen gehigarri
Aurretik ere egonda dago bertso eskola Elgetan. Urte asko dira, ordea. Urte askoko etenaren ostean Herri Eskolan ekin zioten bertso saioei. Eskolan LH6ko ikasleek bertsolaritza tailerra jasotzen dute Bertsozale Elkartearen eskutik eta Udalarekin elkarlanean antolatuta. Ikasturte osoan zehar egiten dute saio bat hamabostean behin.