Intxorta 1937 kultur elkarteak eta Elgetako Udalak antolatuta, oroimen historikoaren hilabeteak bost ekitaldi izango ditu. Lehenengoak Josu Santamarina historialari eta arkeologoa izango du protagonista. Euzkadi en ruinas liburua aurkeztuko du eguaztenean, urriak 1, osoko bilkuren aretoan, 18:30ean.
Ekitaldi nagusiak, ordea, urriaren 4rako iragarri dituzte. 11:00etan, antzeztutako bisita gidatua abiatuko da Andra Mari plazatik, eta omenaldi ekitaldia zein lore eskaintza izango dira, 13:00etan, Intxortako Atean.
Eñaut Elorrieta antzokian
Urriaren 10ean, Eñaut Elorrietaren bakarkako kontzertua izango da Espaloia kafe antzokian. Saioa 22:00etan hasiko da eta sarrerak salgai daude 5 euroko prezioan udaletxean zein Entradium plataforman.
Udal ordezkariek agerraldia iragarri dute astelehenerako, hilak 29. Egitarauaren inguruko xehetasun gehiago emango dituzte udaletxean, 18:00etan.