"Elgetan, azkenaldian, ez dira zirkulazio arauak betetzen. Saiatu gara jakinarazpenekin, baina egoerak bere horretan jarraitzen du. Hala, herritarren segurtasunerako eta oinezkoen zein ibilgailuen arteko bizikidetza bermatzeko hiri-trafiko ordenantza prestatu dugu", azaldu du Ibon Unzetabarrenetxea alkateak.
Aparkatzeko debekatuta dauden espazioen berri ematen du ordenantzak, eta aipamen berezia egiten zaie Asentziori zein herriko espaloiei eta oinezkoendako guneei. "Arau-hausteekin lotutako isunen berri ere ematen du. Zigorra ezartzeko ahalmena alkatearena izango da", esan du Unzetabarrenetxeak.
Aho batez hartutako erabakia
Udalean ordezkaritza duten bi talde politikoek –EH Bildu eta EAJ– elkarlanean landutako ordenantza da, eta aho batez onetsi dute hasierako onarpena. Erakusketa publikoan egongo da, 30 egunez. Alegaziorik aurkezten bada, aztertu egingo dira. Bestela, onartu eta indarrean sartuko dira.
Ordenantza hemen dago ikusgai.
