Kanpainaren helburu nagusia da umeei mugikorra erabiltzeko beharra murriztea eta kanpainari esker herriko hainbat saltoki eta tabernako telefonoak doan erabiltzeko aukera izango dute behar edo larrialdi egoeran dauden gaztetxoek aurrerantzean. Herri askotan egin den eran, Altxa Burua taldearen ekimena da Elgetan ere. Hauek dira kanpainarekin bat egin duten herriko establezimenduak: Goikoetxea harategia, Elkoro farmazia, Ilea ile-apaindegia, Ugari denda, Udala, liburutegia, eta Bola Toki, Haizea, Janela, Lola zein Maialde tabernak. Pegatina identifikatzaile bana dute ipinita. LH1etik gorako ikasleen eta haien familien artean eman dute kanpainaren berri.
Gurasoen arteko paktu proposamenak
Gurasoen arteko paktu proposamenen lanketan ere badihardute Elgetako Altxa Burua taldean. Duela bi ikasturte hasi ziren umeei smartphoneak emateko adina atzeratzeko konpromisoa adostu aldera. Aurten, SmartWatchen inguruko paktuak ere proposatu dituzte. "Ideia da smartphoneen eta smartwatchen emate-adina atzeratzea, eta momentu hori heltzen den bitartean guraso nahiz gaztetxoen heziketa sustatzea informazioa, kontzientziazioa eta erritmoen errespetua oinarri hartuta. Helburu nagusia da erabilera kontziente eta arduratsua lortzea", azaldu dute.