Auto klasikoen erakusketa egon da gaur ikusgai Elgetako Mendizaleen plazan. Bestelako autorik ere izan den arren, 50 urtetik gorako autoetan oinarritutako erakusketa izan da. Fernando Errasti, Agustin Lazpiur eta Aitor Zabaleta izan dira antolatzaileak, Elgetako Udalaren laguntzarekin. Goizeko 11:00etan eman diote hasiera erakusketari, eta 12:30ak aldera, autoekin ibilaldia egin dute Elgetako kaleetan barrena.
Zabaletak adierazi duenez, erakusketa egitearen ideia ez da berria: "Pandemia aurretik pare bat aldiz egin genuen, eta ostean, beti egon gara egiteko, baina laga egiten genuen. Azkenean, aurten, alkatearekin elkartu eta denon artean antolatu dugu".
Antolatzaileak pozik gelditu dira herritarrek erakutsitako interesarekin, eta horrelako erakusketek geroz eta ikusmira gehiago sortzen dutela uste dute: "Geroz eta ikusmira gehiago sortzen du, horrelako auto zaharrak ez direlako egunero ikusten". Autoen maila ere nabarmendu dute: "Hemen 100era heldu ez arren, 80 urte inguruko autoak daude, eta beste batzuk 50 urtekoak. Denak daude ganoraz zaharberrituta".
Garai batean horrelako erakusketak igandero egiten zituztela gogoratu du Zabaletak, baina egun zail egiten zaiela horrelako maiztasun batekin elkartzea. Hala ere, aurrera begira erakusketa gehiago antolatzeko asmoa dutela iragarri du, baina, auto berriagoekin: Aurten auto zaharrekin egin dugu erakusketa, eta hurrengoan auto gazteagoekin egingo dugu".