Ahobizi zein belarriprest txapa berriak izango ditu laugarren Euskaraldiak, eta, Elgetaren kasuan, udal liburutegia izango da banaketa-puntua. Hala, bertatik pasa beharko dute txapak jasotzera maiatzaren 15etik 25era egitekoa den Euskaraldian parte hartzekoak diren euskaltzaleek.
Txaparekin batera euskaltzaleek ariketa ondo egiteko gomendioak jasotzen dituen orri-markatzaile bat eta Euskaraldia Hikan izena emanda egonez gero H pegatina ere jasoko dituzte.
Euskaraldia batzordeak kalean ere ipiniko ditu mahaiak; maiatzaren 9an, 10ean eta 11n izango da.
Txapak doan dira, baina izena emanda egon behar da jaso ahal izateko, eta izen-ematea Euskaraldia.eus atarian egin daiteke.
Entitateei dei berezia
Enpresak, komertzioak eta elkarteak entitate moduan izena ematera deituta daude. Elgetakoek postaz jaso dute informazioa.
Elgetako Euskaraldia batzordeak maiatzaren 14an egingo du hurrengo batzarra, 19:00etan, Ozkarbi elkartean. Irekia da.
