Apirilaren 2an ospatu da Haur Liburuaren Eguna eta apirilaren 23an aldarrikatuko da Liburuaren Eguna. Hori horrela, urteroko Liburutegia plazara ekimena iragarri du udal liburutegiko arduradun Geaxi Ezpeletak. 16:00etarako prest izango du mahaia plazan, eta liburutegiak eskaintzen dituen zerbitzuen berri emango du bertan.
Horrekin batera, 18:15ean, familia giroan ikusteko ipuin saio musikatua egingo dute Naita Produkzioak taldeko Nerea Ariznabarreta kontalariak eta Mariano Hurtado musikariak. Ezberdin bezain eder ipuin saioa izango da, eta protagonista izango ditu, besteak beste, txirula izan nahi zuen kontrabaxu bat edo milaka koloretako eguzki izpi arraroa jaso duen urtxintxa. "Ezberdina izatea, horixe da kontaketa honetan darabilgun gaia", azaldu dute.
Liburutegian, bestalde, ikusgai dago artista liburuen erakusketa, eta hilaren 11rako Ipuinen Ordu Berezia iragarri du kontalari talde boluntarioak.
