Elgetako Udalak otsail hasieran zabaldu zuen kiroldegiko Bolatoki taberna-jatetxea ustiatzeko kontratazio-prozedura. Bi hautagaitza izan dira, eta Mari Carmen Salasek irabazi du ustiapen-lehiaketa.
Salas, "oso pozik"
Notizia oso pozik hartu du Salasek: "Oso pozik nago. 55 urte egin behar ditut eta seguruenik hau izango da nire azken txanda. 19 urte noa Elgetan lanean eta oso gustura nago. Esango nuke herritarrak gustura daudela nirekin eta ni eurekin ere bai, noski".
Gaineratu du lankideak ere oso pozik daudela eta duen lantaldearekin "oso gustura" dagoela.
Zerbitzuak mantendu egingo ditu
Orain artean eskaintzen zituen zerbitzuak mantenduko ditu Bolatokiak: "Astean zehar eguneko menuak ematen jarraituko dugu eta barran pintxoak izango ditugu egunero. Asteburuetan, berriz, orain artean bezala emango ditugu hanburgesak, plater konbinatuak, menu bereziak, kontzertatuak...". 70 lagunendako lekua dute eta kanpoan ere badute espazio gehiago. "Asteburuan eguraldi ona egiten badu, jende mordoa egoten da. Orain dela hiru asteburu, esaterako, 80 pertsona izan genituen bazkaltzen".
Negozioa "gogorra" dela ere aitortu du, baina gustura jarraituko duela lanean.
