Eskolako danborradak bi emanaldi egingo ditu San Sebastian Egunean; 11:45ean elizpean eta 15:30ean frontoi zaharrean. Lehenengo saioa San Sebastian Kofradiako Nobleen ekitaldiari hasiera eman aurretik izango da. Aurreko urteetan, aste bukaerarekin izan da San Sebastian Eguna, eta ez da halakorik egon, baina aurten posible izango da, eta pozik daude kofradeak. "Oso polita izaten da eta poztasun handia ematen digu", azaldu du kofradiako kide Alex Aranzabalek.
Bigarren saioa 15:30ean izango da, frontoi zaharrean. Familiei begira egindako saioa izango da hura.
Nobleen ekitaldia
Aurten, 23 lagun elkartuko dira: Elgetako eta Uberako hemezortzi kide eta Angiozarko bost. Danborradaren ostean, meza entzun eta sakristiako ekitaldia egingo dituzte. Azkenik, 14:30ean, bazkaria egingo dute, Maialden.
Errege Katolikoen aginduz sortu zen, 1482an, San Sebastian kofradiako Nobleen Kofradia Elgetan. Helburua zen lur-jabeei euren lurrak defendatzeko armak erabiltzeko baimena ematea. Egun, oraindik ere eta hutsik egin gabe, Uberako, Angiozarko eta Elgetako kofradeek elkarrekin egiten dute ekitaldia San Sebastian Egunean.
