Udazkenetik negurako egun gero eta ilunagoen bueltan ospatzen da Gau Beltza edo Arimen Gaua. Hala, kalabazak hustu, aurpegi itxura eman eta kandelak pizteko egunak datoz.
Gaua, beldurra, gozokiak, gauez lagunekin ateratzea, mozorroak... Gazteendako erakargarriak diren osagai ugari ditu Gau Beltzak, eta azken urteetan ospakizunak herrian izan duen harrera da horren erakusle.
Maala guraso elkartearen gidaritzapean prestatu dituzte eguen iluntzeko ekintzak. 18:00etarako puska batzea antolatu dute, 19:00etan festa egingo dute frontoi zaharrean eta 20:30ean ipuin kontaketa edo beldurrezko ibilbidea.
Herri Eskolan ere jarduera bereziak egingo dituzte hilaren 31n. Zuzendaritzatik jakinarazi dute gaiarekin lotutako ekintzak egingo dituztela.
Aurretik, Josu Ozaitarekin bisita
Gau Beltzarekin lotuta urteetako kezka izan da jaia jatorri arrotzeko kutsua hartzen ari zela. Gaia ikertu duen Josu Ozaita antropologoa Elgetan izan zen aurreko astean. Eskolako ikasleekin elkartu zen lehenengo. Idatzitako Gau beltza liburuaren berri eman zien LH-4ko, LH-5eko eta LH-6ko ikasleei, Tertulia dialogikoak izeneko formatuko saioetan. Ozaitak herritarrentzako hitzaldia ere egin zuen iluntzean liburutegian.
