Zatoz bertso eskolara! lelopean zabaldu du izen-ematea Udalak. Taldea osatzen bada bertso eskolaren saioak urritik ekainera artekoak izango dira. Taldea eguaztenetan elkartuko da 17:30etik 18:30era eta ikasturte osoko matrikula 75 euro dira.
Taldea osatuz gero lehenengo saioa hilaren 16an izango da; hurrengo eguaztenean. Interesatuek debagoienakobertsoeskolak@gmail.com helbidera bidali behar dituzte izen-abizenak, jaiotza data eta heldu baten kontaktua. Izena emateko azken eguna hilaren 11a da, barikua.
Eskolako saioen gehigarri
Aurretik ere egonda dago bertso eskola Elgetan. Urte asko dira, ordea. Urte askoko etenaren ostean Herri Eskolan ekin zioten bertso saioei. Eskolan LH6ko ikasleek bertsolaritza tailerra jasotzen dute Bertsozale Elkartearen eskutik eta Udalarekin elkarlanean antolatuta. Ikasturte osoan zehar egiten dute saio bat hamabostean behin.
