Aurten ere euskara ikastaroak herrian bertan jasotzeko aukera izango dute elgetarrek, baldin eta taldeak osatzen badira.
AEKrekin elkarlanean egin du eskaintza Udalak eta eskaintzen diren mailak dira: alfabetatze hasiera, mintzapraktika, A1, A2, eta C1. Alfabetatze hasierako taldea ez ezik gainerako guztietan bina orduko bi saio izango dira astean. Ordutegiak zehazteke daude.
Iaz oso antzerako proposamena egin zuten Debagoieneko AEK-k eta Elgetako Udalak baina ez zen talderik sortu. "Aurten beste saiakera bat egitea pentsatu dugu, herritarrek aukera hau izan dezaten", azaldu du euskara zinegotzi Maialen Arnedok.
Izen-ematea zabalik
Izen-ematea zabalik da udaletxean irailaren 27ra arte. Taldeak osatu ahal izateko gutxienez sei lagun beharko dira. Asistentzia maila %75tik gorakoa bada Udalak laguntzak emango ditu ikasturte bukaeran.
