Bi gune nagusi izango ditu Elgetako Ferixa Nagusiak: artisauen eta baserritarren azoka plaza inguruan eta ganadu azoka Berraondokoan. Sebas Arantzabalek aurreikusten du 45 bat postu elkartuko direla artisauen eta baserritarren azokan: "Azken baieztapenen faltan, esan daiteke urteroko ekoizleek hartuko dutela parte azokan. Ez da herriko baserritarrik izango; bai, ordea, artisauak eta bestelako jakiak aurkeztuko dituztenak". Sonia Miranda, Pili Arin, eta Maite Barrainkua artisauen azokan izango dira. Jon Aranzetak Larrabiltxoko eztia eskainiko du eta Hasna Bohouchek, Mohamed Elhoumanik eta Omar Bittik, Marokoko gozoak. Beste hainbat ekoizlerekin osatuko da azoka. Gazta, ogia, gozoak, barazkiak, frutak, etxetresnak... Segurako talogileek eta Elgoibako Lizasagar sagardotegiak ere postu bana izango dute.
40 bat idi pare
Ganadu azokari dagokionez, idiak izan dira beti Elgetako ferixako bereizgarri nagusia eta 80 bat espero ditu Agustin Beretxinagak aurtengorako. Hau da, 40 bat idi pare. Aurten ere berak dihardu ganadu feriaren antolaketan laguntzen, eta, azaldu du hamasei pare izango direla bizkaitarrak eta 28 bat pare gipuzkoarrak.
Herriko ganaduzaleek ere izango dute lekua azokan; besteak beste, Arantzeta baserriko Pello Bilbaok ardiak eta ahuntzak eramango ditu, Lapurdiko Roberto Basaurik behorrak eta astoak, Larrabilgo Ormaetxeatarrek ardiak eta Barrenenguako Beretxinagatarrek idiak, behiak eta txahalak. Azoka goiz osoan zehar izango da ikusgai.
