Ikasturtea amaitzear da eta aurreko ikasturteetan bezala aurtengoan ere Eskolako Jaia egingo dute Elgetan. Eskolako webgunean dago ikusgai egitaraua.
Seigarren mailako ikasleen irratsaio emanaldiarekin emango diote hasiera, 09:30ean. Egunean zehar, bestalde, ekintza bereziak egingo dituzte ikasgeletan, besteak beste, ikasleendako ipuin kontularitza saioak.
Bazkalostean, 14:30ean hasiko dira irakasleek eta familiek antolatutako tailerrak eta 16:00ak arte luzatuko dira. 16:00etatik aurrera jarraitu egingo dute ekintzek eta herri kiroleko probak izango dira frontoi zaharrean. Eskolako sarreran egongo da izena emateko orria.
Dantza egiteko tartea etorriko da gero; izan ere, koreografien txanda izango da 17:00etatik aurrera. Sei kantu daude aukeran: Ikusi mendizaleak, Harri koxkor, Maritxu, nora zoaz?, Furra, furra, Txantxibiri edo itsasontzi baten.
Eskolako kamiseta edo jertsea eramateko gonbidapena luzatu dute ikastetxetik.
