Goizean Intxortako frontea ezagutzeko ibilbide tematiko gidatua egin dute, eta, horrez gain, senderismo eta artisau azokako postuak jarri dituzte herriko plazan. Haur eta gazteek abentura-gunean hainbat jarduera egiteko aukera izan dute eta eguerdian, Unai Cantabranak berak konposatutako abesti nahiz bertsioekin osatutako kontzertua eman du.
Elgetako alkate Ibon Unzetabarrenetxeak adierazi du Puntaik Punta jaialdia "primerakoa" dela Elgeta bezalako herri bat Debagoienera zabaltzeko, besteak beste, kultura eta turismo aldetik: "Aukera paregabea da eta aprobetxatu egin behar da". Puntaik Punta prestatzen herriko elkarte eta eragileekin batera ibili dira. "Hasieratik sekulako prestutasuna erakutsi dute, eta udaletik ere balorazio positiboa egiten dugu. Jendea ere pozik, herriari beste bizitasun bat ematen diolako. Orduan, balorazio positiboa egiten dugu", dio Unzetabarrenetxeak.