Areto futbol txapelketan hasi zen giroa animatzen. Bost bat taldek hartu zuten parte, eta eguerdirako bazegoen irabazlea; Pintxopote taldeko lagunak. Domina bana jaso zuten irabazleek eta behin sari banaketa eginda hasi zen karro-poteoa tabernaz taberna.
70 bat lagun bazkaltzen
Bazkaria giro onean joan zen. 70 bat lagun elkartu ziren kafe antzokian eta paella izan zuten plater nagusi. Postrearen ostean eman zitzaion hasiera JB bikotearen emanaldi akustikoari. Laster bereganatu zuten publikoa.
Arratsaldeko karro-poteoaren ostean, 22:00ak aldera hasi ziren gaueko kontzertuak. Ordurako jende gehiago hurbildu zen eta batak bestearen atzean jo zuten hurrenkera honetan Korda Rota taldeak (Arrasate), Fito Skins taldeak (Elorrio), Kaparrak taldeak (Aretxabaleta) eta Babesgabe taldeak (Elgeta). DJ Kadira bikotearen musikarekin luzatu zuten gaua Elgetan.
