Giro aparta izan dute Elgetako frontenis txapelketan. Guztira, hamazazpi bikotek hartu dute parte: hamaika gizonezkoetan eta sei emakumezkoetan. Elgetako parte-hartzaileez gain, oñatiarrez, bergararrez, elorriarrez eta idiazabaldarrez osatutako bikoteak ere egon dira frontenis txapelketan.
Gizonezkoen txapela Elgetan gelditu da. Ibon Unzetabarrenetxea eta Eneko Maguregi 25-16 nagusitu dira Gontzal Azkarraga-Urizar eta Unai Hernaltes bikotearen aurka. Esan behar da iazko txapeldunei irabazi dietela aurten finala Unzetabarrenetxeak eta Maguregik.
Emakumezkoen finalean ere aurpegi ezagunak izan dira. Iazko irabazleek ez dute txapelketan parte hartu baina Ihintza Imaz eta Maialen Ezeolaza finalera heldu ziren iaz ere. Aurten bai, txapela jantzi dute Esti Markos eta Lierni Asuabarrenak osatutako bikoteari 25-20 irabazita.
Zozketa
Antolatzaileak oso eskertuta daude herriak emandako laguntzagatik. Herriko dendak eta tabernak, Udala eta laguntzaile guztiak aipatu dituzte. Jakinarazi dute, bestetik, eginda dela txerri-besoaren zozketa eta zenbaki irabazlea 86 dela. Ordezkoa, berriz, 495.
