Otsailaren 24an egingo dute VI. Mendi Mendia Racing jaia. Oraindik kartelak argia ikusi ez badu ere antolatzaileek GOIENAri aurreratu diete iazko egitarauaren antzerakoa prestatu dutela; aldatu dutena dela kontzertuak emango dituzten taldeen zerrenda: Iskanbila, Neallta Fola eta Sindy Berbenas. Mendi Mendia Racing jaiaren helburuetako bat da rallyak eta motorraren mundua herritarrengana gerturatzea. Horretarako, goizean, rally-autoak eta auto klasikoak elkartuko dituzte, nahi duen guztiak gertutik ikusteko aukera izan dezan. Gainera, iaz nobedade izan zenak ere aurten lekua izango du egitarauan; izan ere, herriko mendi lasterketa ere egingo dute eta ondoren, sari banaketa. Eguna borobiltzeko, poteoa eta bazkaria ere egongo dira.
Bestalde, endurozaleek apirilaren 6an izango dute aukera Piñu-kokuk antolatutako IV. Enduro Martxan parte hartzeko. Data baino ez dute iragarri, baina adierazi dute laster emango dutela informazio gehiago.