Euri-urak eta ur zikinak banatzeko lanekin hasi da Gipuzkoako Urak San Roke kalean, eta, gutxi gorabehera, bi hilabete iraungo dute lanek. Lehenengo, urak bideratuko dituzte, Unzetabarrenetxeak azaldu duenez, eta, ondoren, baldosak egokituko dituzte Intxorta elkarte parean, irisgarritasuna hobetzeko.
Aurrekontua 40.000 euro ingurukoa izatea aurreikusten du: "Ez zen 5.000 eurora iristen. Baina Udalak kaleko beste aldean dauden baldosak konpontzeko konpromisoa hartu zuen, eta, horrekin, 40.000 euro izatea aurreikusten da; agian, gehiago".
Herrian luzaroan egon dira obra horiek egiten hasteko zain, eta San Rokeko lanen hasierak bide emango die kaleko urbanizazio lanei: "Asko itxaroten egon gara; orain, San Roke kaleko irisgarritasuna hobetzea tokatzen zaigu".
Beste obra bat amaitzear
Elgetatik Bergararako bidean ere lanak egin dituzte azken asteetan. San Antonio parean zanga zabaldu dute, gune hartatik Arantzetara ura eramango duen hodia sartzeko. Alkateak jakinarazi duenez, lanok amaitzear daude.
