Lehenengo aldiz egingo dute bigarren eskuko mozorroen azoka Elgetan, eta zaila da aurreratzea zenbat lagunek hartuko duen parte. "Printzipioz, bakoitzak etxean duena hartu eta plazara eramatea da. Talde handi bat elkartzen baldin bagara, azoka polita sortu daitekeela uste dut", azaldu du Ingurumen batzordeko arduradun Miren Ibarbiak.
Mozorroak trukatu, saldu edo oparitu norberak erabakiko duela esan du Ibarbiak. Kontua da etxean pilatuta egon daitezkeen mozorroei bigarren aukera bat ematea eta berrerabiltzea. 16:30etik 17:30era egingo dute azoka plazan.
