Atzotik gaur goizaldera bitartean lapurrak sartu dira Elgetako Bolatokira. Ertzaintzak goizean jaso du deia, eta zer gertatu den argitzeko ikerketa zabalik zuen oraindik eguerdi partean.
Jolas-makinako dirua
"Gauean, 01:20 inguruan, alarmaren alerta jaso dut; sakelakoarekin konektatu naiz baina ez dut ezer arrarorik ikusi. 10 minutu geroago berriro ere begiratu dut baina orduan ere ez dut ezer ikusi", azaldu du Bolatokiko arduradun Mari Carmen Salasek. Goizean Elgetara heldu denean, 08:40ean, konturatu da zerbait gertatu dela, atea indarrez irekita zegoelako: "Jolas-makinako dirua bakarrik eraman dute, baina teknikoak adierazi dit ez dutela diru askorik eraman, makina barruan dirua utzi dutela". Gau guztian taberna inguruan egon diren susmoa du Salasek: "Jolas-makina 05:00ak inguruan apurtu dute".
Eguerdi parterako taberna zabaldu du Salasek, eta arratsaldeko lehen orduan joan da Ertzaintzaren bulegora salaketa jartzera.