Gaztetxea zegoen ondoko orubean hasita dago berriro ere makinen mugimendua. Pumptrack gunea egiteko lanak dira, eta Ibon Unzetabarrenetxea alkateak azaldu duenez aurreikuspena da hiru hilabeteko epean kirol azpiegitura berria erabilgarri egotea. "Eguraldiak laguntzen badu, lehenago bukatuko dira lanak; baina horrelako obrak eguraldiaren menpe daude".
Bi zortziko izango ditu Elgetako pumptrack guneak eta bata bestearekin konektatuta egongo dira. Udal arduradunek nahiko lukete wallride egiteko aukera ere eskaintzea. "Lanak aurrera joan heinean jakingo dugu posible den edo ez", esan du Unzetabarrenetxeak.
500 bat metro karratu
Pumptrack guneak 500 bat metro karratuko azalera hartuko du. Urtarrilean egin zituzten orubea prest uzteko lanak, eta, hormigoizko horma altxatzearekin batera, Aixolarako bidean hobekuntzak egiteko baliatu zituen obrak Udalak.