Intxortako 26. igoera jokatu dute gaur eguerdian Elgetan. 11:00etarako prest ziren korrikalariak, eta Intxortara joan-etorria egin behar izan dute. Martin Egizabal izan da lehena helmugara heltzen. Bere denbora 17:15. Ondotik heldu da 12-16 urte arteko kategorian aritu den Unax Agirre (17:38). Unai Fraile (21:31) eta Galder Agirrezabal (21:43) heldu dira ondoren.
Emakumezkoetan, Nerea Goikoetxea izan da azkarrena (22:38). Goikoetxeak, gainera, 2019an Argider Txurrukak jarritako errekorra hobetzea lortu du. Minutu bat eta bederatzi segundo gutxiago behar izan ditu Intxortarainoko joan-etorria egiteko. Esan behar da Txurruka ez zela gaur Elgetan. Peraltako Ikastrail jokatu du eta baita irabazi ere.
Emakumezkoen podiuma Saioa Ugidosek (24:46) eta Inma Rafaelek (26:18) osatu dute.
12-16 urteko nesken podiumean izan dira, berriz, Maddi Barrutia (26:43), Ines Egizabal (27:58) eta Dia Cot (38:39).
Txurruka izan da emakume azkarrena Peraltan jokatu den 15 kilometroko Azkotrail lasterketan. Bere denbora: 1:48:28. Elgetarrak 16. postua egin du sailkapen orokorrean, eta lehenengoa emakumeetan.
