Martxoan hasi ziren astrotopaketak egiten Elgetan. Ilatargi elkartearen eta Elgetako liburutegiaren ekimenez sortutako ekimena da, eta udako etenaldiaren ostean bueltan izango dira hileroko saioak.
Eguaztenean, hilaren 27an, egingo dute hurrengoa. 18:30ean elkartuko dira liburutegian eta helburua da teleskopio baten inguruko informazio orokorra ematea eta horrekin batera erabilera jarraibide erakustea. Pare bat orduko saioa izango da eta parte hartzea irekia da.
Teleskopio bat maileguan
Ekimenak badu beste osagai garrantzitsu bat. Ilatargi elkarteko kideek jakinarazi dute teleskopio bat utziko dutela liburutegian eta maileguan hartzeko aukera izango dutela eguazteneko saioan gutxieneko erabilera jarraibideak jaso dituzten herritarrek.
Argibideak liburutegian eska daitezke. Astrotopaketen inguruko informazioa jaso daiteke, baita ere, informazio kanalaren bitartez: https://t.me/astrotopaketak
