"Beste urte batzuetan baino haur gehiagorekin hasi dugu ikasturtea, beraz pozik gaude!", esan du Eneritz Vazquezek. Aurreko urteko egoera ez zen samurra izan, baina aurten lasaitasun handiagoarekin abiatu dute ikasturtea.
Bi hezitzaile izango dira eta hasiera batean bost erabiltzailerekin zabaldu dute zerbitzua. Urriaren 5ean ekin zioten egokitzapenari eta aste honetan, esaterako, ordubeteko tartea egin dute umeek gurasoekin haur eskolan.
Zerbitzua doan
Aldaketa garrantzitsuak dira aurten haur eskolan. Nagusienetako bat zerbitzua doan dela erabiltzaile guztiendako. Eusko Jaurlaritzaren Hezkuntza sailak iaz iragarri zuen Haurreskola Partzuergoa sareko zerbitzua doan izango zela ikasturte honetan eta orain sartu da neurria indarrean.
Ordutegiekin ere badira aldaketak. Sarrera eta irteera ordutegiarekin lotuta, batez ere. Elgetako haur eskola zerbitzutik jakinarazi dute ikasturte hasierako matrikula epealdia zabalik dela oraindik; domekan itxiko da. Edozein argibide edo zalantza haur eskolan bertan argituko dute.
