"Iaz ez genuen izan denborarik azoka antolatzeko, eta protesta moduko bat egin genuen. Aurten, aldiz, normaltasunez egingo dugu gandu azoka", dio urteetan Elgetako ganadu azoka prestatzeko ardura duen Agustin Beretxinagak.
10:00etan hasiko da herriko eta Debagoieneko artisau eta ganadu azoka. Berraondokua plazan jarriko dute ikusgai ganadu. Beretxinagak azaldu du 30 idi-pare, bi behi-pare, 30 bat behi –Elgetakoak–, ahuntz azpigorriak, behorrak, eta txerriak egongo direla. "Idiak etorriko dira ia Euskal Herri guztitik: Hondarribia, Aia, Errezil, Bergara, Elorrio, Orozko...", azaldu du.
Elgetako azokako berezitasuna idiak izaten dira: "Ez da beste inon horrelako feriarik egiten".
Askotariko postuak
Barazki-postuak eta artisauak ere egongo dira uztailaren 2an. "Eskaera gehien egiten dutenak artisauak izaten dira", dio azoka antolatzen ibiltzen den Sebas Arantzabalek. Aurtengo azokarako eskaera egin dute 40 bat artisau edo nekazarik. Denetariko produktuak dastatzeko eta erosteko aukera egongo da: barazki ekologikoak, gazta, eztia, kontserbak, ogia, berakatza, burdindegiko produktuak...
Elgetako artisauek ere jarriko dute postua: "Bi artisau postu jarriko dituzte elgetarrek, eta baita janaria ere, marokoar jatorriko janaria eta gozogintza".
10:00etatik 14:00etara bitartean egingo dute azoka plazan eta inguruko kaleetan. Jendea animatu nahi duten jaietako domekan azokaz gozatzera.