Zapore gazi gozoa utzi du aurtengo Asentzio Egunak. Atzoko lapurretak ezustean harrapatu ditu herritarrak, Ibai Etxanizek azaldu du "ez zegoen ezer lapurtzeko, eta kandelen negarrak jasotzen dituzten platertxoak eraman dituzte". Hala ere, eguraldia "lagun" izan dutelarik hasiera eman diote jaiari, 11etan auzotarrek antolatutako mezarekin. 12tarako prest zuten ermita pareko belardian, elgetarrentzako eta Ubera eta Angiozarreko auzotarrentzako jan-edana eta musika. 130 pertsona baino gehiago gerturatu dira jaira, eta gutxi batzuk kotxean hurbildu diren arren, gehienak oinez bertaratu dira.
