Lehenengo ekintza atzo egin zuten; ikastolen sortzaile eta euskarazko hezkuntzaren aitzindari Elbira Zipitria Irastortzaren bizitzan oinarritutako Elbira dokumentalaren emanaldia egin zuten udaletxeko areto nagusian.
Gainerakoak gaur izan dira. Intxortako lubaki gunea ezagutzeko bisita gidatua egin dute 10:00etan plazatik abiatuta. Hogei bat laguneko taldea abiatuta da, eta hainbat geldialdi egin dituzte ibilbidean zehar puntu esanguratsuenetan azalpenak emateko. Ia goiz osoko txangoa izan da eta poteoarekin amaitu dute ekintza herrian.
Bihar oroimen-ekitaldia plazan
Gazte Asanbladaren ekintza hauek Intxortako frontea jausi izanaren 87. urteurreneko ekitaldien barruan kokatzen dira. Udalak eta Intxorta 1937 kultur elkarteak bihar eguerdian egingo dute urteroko oroimen-ekitaldia Mendizaleen Plazan. Aurten, langile batailoietan eta preso egondako elgetarrak omenduko dituzte.