Martxan da umeendako ipuin kontularitza tailerra. Maider Galarzak gidatuta, kontularitzan trebatzen hasita daude bospasei ume. Liburutegiko arduradun Geaxi Ezpeletak Gu ere kontalari abiarazi nahi du atzera ere. "Datorren astean irekiko da izen-ematea. Lehen saioa maiatzaren 5ean izango da", esan du.
'Liburuak plazara!' gaur
Liburuaren Eguna dela-eta, Liburutegia plazara! ekimena dago iragarrita gaurko. Ezpeletak plazara aterako ditu liburuak, 16:00etatik 18:30era, eta 17:30ean Otsoak maite ikuskizuna izango da plazan.
Ezpeletak gogorarazi du, bestetik, zabalik dela artista liburuen erakusketa apiril amaierara arte. "Nahi duenak bere lanak ekartzeko aukera du oraindik ere".
Maiatzerako, aldiz, hezkuntza digitalaren gaineko bi saio daude iragarrita. Maiatzaren 3an, Heziketa eta segurtasuna Interneten hitzaldia egingo du KZguneko aditu batek; apirilaren 30erako eman behar da izena. Eta maiatzaren 17an, beste saio bat izango da gurasoen hausnarketarako. Liburutegiak, KZguneak eta Herri Eskolak elkarlanean antolatuta.
