Eguraldia ez dute lagun izan, euria eta lokatza izan baitira nagusi; hala ere, pozik aritu dira ziklistak bizikleta gainean. Jaitsierak, ordea, nekezagoak izan direla aitortu dute. Antolatzaileek 120 lagun inguru espero zituzten, baina, azkenean, 90 pertsona inguru gerturatu dira. Alabaina, egindako lanarekin eta izandako harrerarekin gustura daudela adierazi dute.
09:15 aldera irten dira parte hartzaileak herriko plazatik. Asentziorako bidea hartu dute, Zaldunborda paretik pasata, eta, handik, Bigarrengo errekara jaitsi dira. Aixolako urtegitik, berriz, plazarako bidea hartu dute, anoa-gunera arte.
Jatekoarekin indarra hartuta, bigarren zatia egitera animatu dira ziklistetako gehienak, eta, Goikomenditik Karabietara egin dute, Azkonabietara helduz. Azkenean, plazan amaitu dute martxa, hamaiketakoarekin batera.
