30 neska-mutikotik gora aritu ziren atzo Espaloian egindako Gabonetako kontzertuan. Gaur, baserritar jantzi eta egun berezia izango dute Herri Eskolan. Nagusienek Gabonetako azoka egingo dute plazan, 09:30etik 11:00etara, eta, ondotik, Olentzeroren eta Mari Domingiren bisita izango dute ikastetxean, eta, horrekin batera, urteroko txistor-jana. Urtarrilaren 9ra arte iraungo duten Gabonetako oporrak etorriko dira gero.
Iluntzean beste hitzordu garrantzitsu bat dute herrian: 18:30ean jaitsiko dira berriz ere Intxortatik ikazkina eta Mari Domingi. Neska-mutikoen gutunak jasotzera joango dira Mendizaleen Plazara.
Pilota txapelketa
Urteroko herri mailako lau eta erdiko binakako eskupilota txapelketa ere sartu da azken txanpan. Urtezahar egunarekin jokatuko da, aurten ere, finala. 11:30ean hasiko da norgehiagoka, udal pilotalekuan. Gaur dira jokatzekoak finalerdietako partiduak, 18:00etan. Hauek dira partidak:
- Sergio Bouzas/Beñat Arabaolaza eta Haritz Gallastegi/Oxel Erostarbe
- Mikel Beretxinaga/Unai Andres eta Andoni Elorza/Josu Horrillo
