Ohikoa den moduan ONCE erakundearen Oroimenak Antzerki Taldearen emanaldia izango da Elgetako erretiratuen kultura asteari hasiera emateko. Ikasturte honetan Microteatros: Tocata y fuga en la resistencia eskainiko dute eta umoretik gerturatuko dira gaurkotasun handikoa den gai bati. Emanaldia hilaren 13an izango da, 18:00etan, Espaloia kafe antzokian.
Biharamunean, hilak 14, Bergarako Alai Berri abesbatzaren txanda izango da. Elgetan egingo du estreinako kontzertua talde berriak. Emanaldi berean joko dute Alaznek eta Unai Cantabranak. Saioa 18:00etan hasiko da kafe antzokian. Sarrera doan izango da.
Bingoa eta txistorra-jana, Ozkarbin
Beste bi ekintza izango dira erretiratuen kultura astearen barruan. Hilaren 15ean bingo saioa egingo dute 17:00etan hasita. Xalbadorpe elkarteko bazkide guztiei zabalik dagoen ekintza da.
Kultura asteari amaiera emateko urteroko txistorra-jana egingo dute erretiratuek. Hilaren 16an izango da, 17:30ean, Ozkarbi elkartean. Mahai bueltakoak amaitu ostean bederatzi saskiren zozketa ere egingo dute.