"Landa eremuko jabeen artean gero eta nabariagoa da bere sail eta mugarriei buruz dituzten zalantza eta ezjakintasuna. Egoera horri aurre egiteko Elgetako Udala, Gipuzkoako Foru Aldundiaren laguntzarekin, seigarren poligonoko sailen mugaketa lanekin hasiko da. Guztira 186 partzela eta 74 jabe ditu seigarren poligonoak", azaldu du baserritarren batzordeko Sebas Arantzabalek.
Geograma enpresak egingo ditu lanok eta helburua da dauden zalantzak eta akatsak zuzentzea, eta GPS koordenadak ematea lursailen mugei. "Horretarako mugakide diren jabeen akordioa beharrezkoa izango da. Ondoren, lanen bukaeran jabe bakoitzak bere sailen planoa eta mugarrien koordenadak agertzen diren dokumentua jasoko du".
Informazio batzarrak, eguenean
Zalantzak argitzeko eta proiektuaren inguruko xehetasunak emateko informazio batzar bi deitu ditu Udalak. Biak izango dira eguenean, urriak 6 eta Espaloia kafe antzokian. Bata 11:00etan eta bestea 18:00etan. "Bertan jabeei prozesu guztiaren berri emateaz gain bere sailen karpeta banatuko zaie, bertan behar diren aldaketak proposatzeko epe bat izango dute".