Hauek dira azken egunak Elgetako liburutegian abuzturako maileguak egiteko. "Ohiko mailegu epea 21 egunekoa izaten da, baina, abuztuan liburutegia itxita egongo denez, egunotan irailerako ema- ten ditugu maileguak", azaldu du liburutegiko arduradun Geaxi Ezpeletak.
Erritmo aldaketa sumatzen dela ere azaldu du. "Neguan mailegu kopurua handia izaten da, eta udaberrian jaitsi egiten da uztailean berriro ere igotzeko. Erabiltzaile kopurua neguan baino txikiagoa da uztailean, baina mailegu kopurua igo egiten da udaberriarekin alderatuta. Horrek esan nahi du dauden erabiltzaileek mailegu gehiago egiten dituztela".
Genero aukeraketari dagokionez, neguko dinamika jarraitzen dela dio. "Une honetan eleberri beltza eta historikoa dira gehien mailegatzen direnak. Liburu eramangarriak eta irakurtzeko errazak lehenesten ditu jendeak. Irakurketa sakonak negurako izaten dira gehiago". Euskarazko liburu arrakastatsuena, oraindik ere, Amets Arzallusen eta Ibrahima Balderen Miñan dela dio.
Eskaintza digitala ere bai
Pandemian digitalak gora egin zuen Elgetan ere. "Erabiltzaile berri asko sortu ziren. Dena den, iaz itzuli ginen hemen pandemia aurreko kopuruetara. Erabiltzaile gehiago daude orain eLiburutegia erabiltzen dutenak, baina paperezkoa ere mantendu egin da. Gure kasuan bai behintzat". Etxeko ordenagailu, tableta eta sakelakotik jaitsi daitezke liburuak eLiburutegitik.