Helburu horrekin sinatu dute lankidetza hitzarmena Elgetako Udaleko eta Euskal Mendizaletasunaren Museoko (EMMOA) ordezkariek. Bi urte barru beteko dira ehun urte Euskal Herriko Alpinismo Federazioa Elgetan sortu zela, eta urteurreneko ekintzen bueltan kokatu behar da San Juan bezperan sinatutako hitzarmena. Euskal Mendizaletasunaren Museoan funts bibliografiko zabala dute, eta material horren zati baten lagapena egingo diote Elgetako herriari, "liburutegian Fundazioaren funtsekin hornitutako atal berezi bat sortzeko".
Udal liburutegian hasita daude lehen liburuak jasotzen. "Hain zuzen, liburu batzuk jaso ditugu, baina gutxi batzuk dira oraindik. EMMOAko kideek euren funtsa kudeatu ahala joango gara liburutegian aleak jasotzen. Beraz, prestaketa lanetan gaude. Txoko berria bisitatzeko prest dagoenean jakinaraziko dugu", azaldu du liburutegiko arduradun Geaxi Ezpeletak.