Ferixa egunak pilota partidu profesionala ekarri du Elgetara. Frontoia lepo beteta, binakako norgehiagokarekin hasi da jaialdia. Artolak eta Imazek 22-20 menperatu dituzte Jaka eta Mariezkurrena, tanto eder askoak utzita.
Estelarrean San Fermin torneoko finalerdia jokatu dute Lasok eta Peñak. Baikoko bi pilotaririk onenak izan dira torneo honetan, eta tiki-taka handiko neurketa jokatu dute. Aldi batzuetan markagailuan aurretik izan da Laso, eta besteetan Peña II.a, baina azkenerako tanto dezente egin ditu erreskadan buruz buruko txapeldunak, eta Peñak amore eman behar izan du. Iruñean, ostegun goizean, Ezkurdiarekin neurtuko ditu indarrak. Buruz burukoaren arantza kentzera joango da arbizuarra, errebantxarako gogoz; Laso, berriz, bere aurtengo palmares ederrean beste garaikur bat gehitzeko ilusioz.
