Badator urteko gaurik motzena; San Juan bezpera, alegia. Beste herri askotan moduan Elgetan ere San Juan sua piztuko dute bihar. Behin ilundutakoan izango da hori. Piloa gertu dago bolatokiko kantxa ondoko zabalgunean. Udalak prestatu du aurten, nahiz eta egon den ekarpen egin duen bateren bat. Kartelak jarri ditu Udalak material gehiago ez botatzeko eskatuz.
Guraso elkartearen ekintzak
Bi urteko pandemian ez da horrela izan, baina Maala guraso elkarteak girotu ohi du urtero San Juan bezpera. Aurten ere horrela izango da. Xaibor DJ iragarri dute, 18:30etik 20:00etara. Ondoren, ogitartekoak banatuko dituzte borondate truke.