Eitb Taldearen Gaztea Cover bertsio lehiaketa finalerdietan da. Lehen finalerdia Iruñeko Zaldi Zurian jokatu da eta epaimahaikideek –Ainhoa Arroitajauregi, Leire Letu eta Chica Sobresalto– aukeratu dituzte finalean parte hartuko duten lehen hiru hautagaiak. Tartean da Unai Cantabrana elgetarra.
Harry Styles artistaren Golden abestia aukeratu du lehiaketan parte hartzeko, eta finalerako txartela eman dio. Lehen finalerdian hamar lehiakideen zuzenekoak eta Hofe x 4:40 nafar artisten emanaldia izan ziren. Cantabranarekin batera lortu dute finalerako txartela Danel Sarasua aretxabaletarrak eta Krusak taldeak. Oraindik ere jokatuko dira finalerdi gehiago.
Esan beharra dago 120 bertsiotik gora jaso dituztela aurtengo Gaztea Cover-en.
Unai Cantabranak finalerdian egindako emanaldia hemen.
Finala ekainaren 14an Miramonen
Bigarren finalerdia ekainaren 7an jokatuko da, Gasteizko Foru Plazan, beste 10 musikarirekin. Final handia ekainaren 14an egingo da, zuzenean, EITBren Miramongo egoitzan.
Sariei dagokienez, epaimahaiaren garaikurrar eta 2.000 euro eramango ditu irabazleak. Entzuleen sariaren irabazleak, berriz, 1.000 euro jasoko ditu musika material profesionala erosteko.