Lehen aldiz, Euskal Herriko Itzuliak emakumezkoen lasterketa izango du 2022 honetan: Itzulia Women. Apirila hasieran lehiatzen den gizonezkoen lasterketaren pareko, World Tour mailako proba izango da; hots, mundu mailako txirrindulari onenak izango dira Euskal Herriko errepideetan. Atzo aurkeztu zuten lehen edizio honetako ibilbidea, eta bailaratik ere igaroko dira Van Vleuten, Vollering, Longo-Borghini eta enparauak.
Maiatzaren 14an jokatuko den bigarren etapan, gizonezkoek apirilaren 8an egin zuten antzeko ibilbidea egingo dute emakumezkoek azken 40 kilometroetan. Hala, Elorriotik gora, Elgeta zeharkatu, Karabietako gaina igaro eta Eibarrera jaitsiko da tropela. Mallabian hasi eta amaituko da 117 kilometro izango duen etapa.
Ordutegiak, zehazteke
Gasteiz eta Labastida lotuko ditu egubakoitzeko lehen etapak, eta aipatutako bigarren jardunaren ostean, Donostian hasi eta amaituko da domekan hirugarrena. Ibilbidearen nondik norakoak aurkeztu dituzten arren, ez dituzte ordutegi zehatzak adierazi.
