Omenaldi ekitaldia antolatu dute hilaren 24rako, domeka. Erresistentziako kideak gogora ekartzeaz gain –soldaduak zein zibilak–, aipamen berezia egingo diete kereilan parte hartutako elgetarrei. Hala, zazpi hilabeteko erresistentzia hartan inguruko mendietan faxismoari aurre egin ziotenak, eta ondorengo egunetan frankismoak eraildakoak omenduko dituzte. Gainera, aipamen berezia egingo diete Frankismoaren krimenak ikertzeko eskaera eginez Elgetako Udalak jarritako bi kereiletarako lekukotzak eman dituzten herritarrei. 2017ko udazkenean aurkeztu ziren kereila kriminalak, Bergarako epaitegian. Hamazazpi lekukotza jaso ziren herrian horretarako propio zabaldutako bulegoan. Hasiera batean, Bergarako epaitegiak tramitera onartu zuen kereila, baina auzitegiko beste epaile batek artxibatu egin zuen ondoren. Argentinako kereila, ostera, zabalik dago.
Omenaldi ekitaldia plazan
Apirilaren 24ko omenaldi ekitaldia Mendizaleen plazan izango da, 12:00etan. Antolatzaileek aurreratu dute lore eskaintza bat egingo dela eta bertan izango direla, besteak beste, Joseba Tapia soinu-jolea eta Kezka dantza taldeko dantzariak.
Egitaraua osatzen duten beste bi ekitaldiak dira 366 egun borrokan Euzkadiren alde delako liburuaren aurkezpena eta Apaiz kartzela ikus-entzunezkoaren emanaldia, ondorengo solasaldiarekin; liburuaren aurkezpena Berangoko Burdin Hesiaren Oroimenaren Museo-
ko zuzendari Aitor Miñambresek egingo du, gaur, hilak 21, udaletxeko areto nagusian. Apaiz kartzela dokumentalaren proiekzioa, berriz, hilaren 27an izango da, antzokian.