Ez da gertatzen den lehenengo aldia. Aspaldi honetan behin baino gehiagotan piztu da alarma Elgetako Domingo Iturbe kalean. Batzuetan lapurrak etxera sartu eta dirua zein baloreko bestelako objektuak eraman dituztelako. Beste batzuetan bizilagunek auzokoa edo herrikoa ez den jendea ikusi dutelako inguruetan zeregin susmagarrietan. Lorategitik lorategira jauzi egiten ere bai.
Gaur gauean berriz gertatu da, eta Ertzaintzak bi salaketa jaso ditu. "Gauerdi inguruan jaso genituen, eta ikuskapena egitera joan ginen. Ikerketa martxan da".
Bizilagunak kezkatuta daude. Lorategietan jendea ibili izanaren zantzuak ikusteak bakarrik kezka handia eragiten du. Ertzaintzatik gomendatu dute etxe bueltan sumatutako edozein aldaketari adi egoteko, eta horren berri emateko. Lorategiak, ganbarak... Ondo begiratzeko. Ez dute informazio askoz ere gehiago partekatu nahi: "Ikerketarendako kaltegarria izan daiteke".
