"Berriro martxan gara!", azaldu dute Elgetako mendi taldetik. Hilaren 21erako iragarri dute pandemia osteko lehen irteera, eta baba-janarekin osatuko dute, gainera. "Atxarte inguruan ibiliko gara oraingoan, Astxikira igoko gara, baina, Alluitzera igotzeko aukera ere izango da, jendearen nahierara. Eguraldi txarra egiten badu, Elgeta inguruan egingo dugu bueltatxoren bat".
Bazkalordurako itzuli nahi dute Elgetara, Ozkarbi elkartean egitekoa den bazkariaz gozatzeko. Irteera doan izango da, eta bazkariaren prezioa bazkalostean kontuak aterata zehaztuko da."Azken urteetan moduan, nahi izanez gero bietarako eman daiteke izena edo mendirako bakarrik edo baba-janerako bakarrik", azaldu dute.
Izena emateko azken eguna, batez ere, bazkarirako, hilaren 18a da. kantsatzeke@gmail.com helbidera idaztea da bideetako bat. Facebook profila ere erabili daiteke. Bestela, idatzi mezu bat 690 74 00 56 telefonora.
