Xalbador elkarteko erretiratuendako ez da urte erraza izan. Pandemia hasi zenetik ekintza ia guztiak etenda izan dituzte, baina egoerak lagunduta zuzendaritza batzordeko kideek erabaki dute urteko batzarra antolatzea. Martitzenerako, hilak 29, deitu dute. Espaloia kafe antzokian egingo dute, 17:00etan.
Elkartearen funtzionamendu egokirako ohikoak diren gaiak izango dituzte mahai gainean: aurreko aktaren onarpena, 2020ko diru kontuak, abendura arteko ekintzak, urteko kuotaren ordainketa data… "Poliki- poliki, betiko martxara itzuli nahiko genuke, egoerak aukera ematen badu", azaldu du elkarteko presidente Pello Ojangurenek.
Boluntarioak zuzendaritzarako
Kezka handiena, ordea, zuzendaritzan sartzeko boluntario falta da. "Bederatzi lagun gara gaur egun, eta batzuek urte mordoa daramate. Txanda emateko unea da, baina ez dago boluntariorik, eta elkarteak aurrera egiteko ezinbestekoa da", azaldu du Pello Ojangurenek.
