Astelehenean egin zuten batzarra Mendi Mendian elkarteko bazkideek, eta orduan hartu zuten zabaltzeko erabakia. Sozio gutxi dira eta berehala zabaldu zuten bete beharreko neurrien gaineko informazioa. Eusko Jaurlaritzaren azken dekretuak jasotzen duen moduan edukieraren erdia baimenduko dute; hau da, gehienez ere hemezortzi lagun.
Gure Bordako sozioek gaur jaso dute zuzendaritzak bidalitako irekieraren gaineko abisua. Intxorta elkarteko zuzendaritzatik jakinarazi dute bihar zabalduko dituela ateak San Roke kaleko egoitzak, eta Ozkarbiko bazkideek ere asteon jaso dute zuzendaritzako kideek bete beharreko neurriekin eta indarrean den arau esparru berriarekin egindako idatzia. Ozkarbi elkarteak barikuan zabalduko ditu ateak.
Dekretuak jasotzen duen moduan elkarte guztiek bete beharreko gutxieneko neurriak dira %50eko edukiera-muga, eta 09:00etatik 02:00etarako ordutegia. Egindako mahai-erreserben eguneroko erregistroa ere jaso beharko dute, besteak beste.
