Mariasun Agirreren eta Carmen Ojangurenen eskutik jaso dituzte oroigarriak Arozenak eta Ezpeletak. Aukera duten guztietan gerturatzen dira odola ematera.
"Hemezortzi urterekin hasi nintzen ni odola ematen. Gero, hemeretzirekin, auto istripu bat izan nuen eta odola behar izan nuen. Aurretik argi baneukan nire burua halako egoera batean ikusitakoan argiago ikusi nituen gauzak. Garrantzitsua da odola ematea. Premia duten pertsonak daude, eta ez da ezer kostatzen".
Iritzi berekoa da Enaitz Ezpeleta. Ahal duen guztietan gerturatzen da odola ematera. "Elgetan tokatzen bada Elgetan, eta unibertsitatera gerturatzen bada horretarako dagoen Arabako autobusa, ba han ere bai. Gutxieneko epe batzuk errespetatu behar dira, eta horren arabera". Gogoan du nola aittittak esaten zion beharrezkoa zela bera moduko gazteek odola ematea bera moduko pertsona nagusiei premia sortzerakoan erreserbak egoteko.
Gipuzkoako odol-emaileen elkarteak
Gipuzkoako odol-emaileen elkarteak urtero egiten du diploma eta intsignia banaketa. Bazkaria antolatzen dute eta bertan egiten dute ekitaldia. Pandemia egoeran, ordea, egokitzapenak egin behar izan dituzte eta orain ari dira iazko oroigarriak banatzen. Nork bere herrian egingo du ematea, eta bazkari batekin beharrean askari txiki batekin.
Hala izan da Elgetako kasuan ere.
