Aurreko astean bukatu zen behin-behineko izena-ematea. Udal arduradunek adierazi dute 68 neska-mutikok eman dutela izena. "Dekretu berria aztertzen ari gara", azaldu du Iraitz Lazkano alkateak, eta taldeak egiteko mugei begira daudela. "Aztertzen ari gara nola egin, baina saiakera egingo dugu izena eman duten guztiek udako aisialdian parte hartzeko". Zerbitzua, hasiera batean, ekainaren 21etik uztailaren 23ra emango du Udalak.
Iaz, hamabost neska-mutiko
Gauzak ondo bidean, beraz, oso bestelako kopuruak izango ditu aurten uztaileko udaleku zerbitzuak. Iaz, lau astez egon zen zerbitzua zabalik –uztailaren 6tik 30era–, eta pandemia tarteko hamabost umek hartu zuten parte. Kontziliazioari eman zitzaion lehentasuna, eta familiek egiaztatu egin behar izan zuten zerbitzua zabalik zen ordutegian gurasoak lanean zirela. Duela bi urte, 2019an, bost astez eman zuen zerbitzua Udalak, eta 86 umek hartu zuten parte.